متحدہ عرب امارات (یو اے ای) کی 7 میں سے 6 ریاستوں ابوظبی، دبئی، شارجہ، فُجیرہ، عجمان اور راس الخیمہ میں گرج چمک کے ساتھ موسلا دھار بارش ہوئی جس کے باعث موسم خوشگوار ہوگیا۔
بین الاقوامی خبر رساں ادارے کی رپورٹ کے مطابق اماراتی محکمہ موسمیات نے خراب موسم کا الرٹ جاری کرتے ہوئے مزید بارشوں کا الرٹ جاری کردی ہے۔
شدید بارشوں کے پیش نظر دبئی اور شارجہ کے تعلیمی اداروں میں پیر کے دن تعطیل کا اعلان کردیا گیا، سرکاری و نجی کمپنیوں کے ملازمین کو گھروں سے کام کرنے کا حکم جاری کیا گیا، حکام کی جانب سے شہریوں کو غیر ضروری سفر کرنے سے منع کیا گیا ہے۔
دوسری جانب گزشتہ روز سعودی عرب کے شہر عسیر اور جازان کے بالائی علاقوں میں ہلکی بارش ہوئی، جس کے باعث موسم خوشگوار ہوگیا۔
سعودی محکمہ موسمیات کا اس حوالے سے کہنا ہے کہ موسم آبرآلود رہے گا جس کی وجہ سے درجہ حرارت میں نمایاں کمی واقع ہوسکتی ہے۔
Facebook Comments