ڈبہ پیک زائد المیعاد کھانوں کا استعمال کوئی بھی پسند نہیں کرتا البتہ اکثر لوگ کھانے کو بلاضرورت ضائع ہونے سے بچانے یا شک و شبے کا سہارا لیتے ہوئے اسے استعمال کرلیتے ہیں جو بہت خطرناک عمل ہے۔
یہ ایک حقیقت ہے کہ کھانے کی مصنوعات کی زائد المیعاد تاریخوں کا موجودہ نظام ہمیں یہ نہیں بتاتا کہ ہمارے فریج میں موجود کھانے کی کوئی چیز کب تک قابل استعمال اور کب ایکسپائر ہو رہی ہے۔
ویسے تو صارفین کی اکثریت کوئی بھی خوراک خریدنے سے قبل اس کے استعمال کی آخری تاریخ ضرور پڑھتی ہے لیکن اگر اس کے باوجود کوئی ایسی خوراک غلطی سے کھالی جائے تو اس کے مضر اثرات سے بچنے کیلئے کیا کرنا ضروری ہے؟۔
اس حوالے سے طبی ماہرین کا کہنا ہے کہ اگر کسی بھی غذا کی میعاد ختم ہونے کے بعد اس کا استعمال کرلیا جائے تو فائدے کے بجائے ’فوڈ پوائزننگ‘یا صحت سے متعلق دیگر خطرات بڑھ جاتے ہیں۔
طبی ماہرین کے مطابق کھانے کی میعاد ختم ہونے کی تاریخ گزر جانے کے بعد اس میں مخلتف اقسام کے جراثیم اور بیکٹیریاز جنم لے لیتے ہیں یا کیمیائی تبدیلیوں کی وجہ سے یہ کھانا غیر محفوظ ہوجاتا ہے۔
میعاد ختم ہونے والے کھانے کا استعمال نقصان دہ بیکٹیریا جیسے سالمونیلا، ای کولی، یا لیسٹیریا کے ہضم ہونے کا خطرہ بڑھاتا ہے جو صحت کے لیے مختلف پریشان کن نتائج کا باعث بن سکتا ہے۔
ماہرین کا کہنا ہے کہ پیک شدہ (پراسسڈ فوڈ) کھانا میعاد ختم ہونے کے تھوڑی دیر بعد کھایا جائے تو ان سے کم خطرہ لاحق ہوتا ہے جبکہ ڈیری مصنوعات یا گوشت معیاد ختم ہونے کے بعد نسبتاً زیادہ خطرناک ہو سکتا ہے۔
کیا آپ نے بھی کبھی غلطی سے یا انجانے میں ایسا کھانا کھایا ہے جو خراب تھا یا اسے استعمال کرنے کی میعاد ختم ہو چکی تھی؟ تو ماہرین صحت نے ایسے کھانوں کے استعمال سے پیش آنے والے ممکنہ خطرات بیان کیے جو درج ذیل ہیں۔
طبی ماہرین کے مطابق ختم المیعاد (ایکسپائیرڈ) غذاؤں میں زہریلا مواد پیدا ہوجاتا ہے جسے کھانے کے بعد انسان متعدد بیماریوں میں مبتلا ہوسکتا ہے جیسے کہ فوڈ پوائزننگ وغیرہ۔
فوڈ پوائزننگ کی علامات میں متلی، الٹی، اسہال، پیٹ میں درد، بخار اور شدید صورتوں میں پانی کی کمی اور اعضاء کا سکرنا شامل ہے۔
ایسی غذا کا استعمال الرجک ردِ عمل کا بھی سبب بن سکتا ہے جیسے کہ سانس کے مسائل، سر درد اور سنگین صورتوں میں اعصاب میں تناؤ وغیرہ۔
ڈبوں میں بند کھانا استعمال کی تاریخ گزر جانے کے بعد رنگ یا خوشبو بدلے یا نہ بدلے اس میں نقصان دہ کیمیکلز کی موجودگی ضرور بڑھ جاتی ہے جس کی وجہ سے اس کا استعمال تکلیف کا باعث بن سکتا ہے۔
اگر آپ نے غلطی سے میعاد ختم ہونے کے بعد کھانا کھا لیا ہے تو ان ہدایات پر عمل کریں تاکہ کسی بڑی بیماری میں مبتلا ہونے سے محفوظ رہ سکیں۔
پُرسکون رہنے کی کوشش کریں :
گھبرانے سے صورت حال میں مدد نہیں مل سکتی، پرسکون رہنے کی کوشش کریں ایسے میں گہری سانسیں لیں اور اندازہ لگائیں کہ آپ کیسا محسوس کر رہے ہیں۔
علامات کا خود جائزہ لیں :
فوڈ پوائزننگ یا الرجک رد عمل کی علامات کے لیے خود کو مانیٹر کریں، علامات میں متلی، الٹی، اسہال، پیٹ میں درد، بخار، سر درد یا چکر آنا شامل ہوسکتے ہیں۔
خوب پانی پیئیں :
پانی پینے سے زہریلے مادوں کو باہر نکلنے اور فوڈ پوائزننگ کی علامات کو دور کرنے میں مدد مل سکتی ہے۔
باقی کھانے کو ترک کر دیں :
اگر آپ کو شک ہے کہ آپ نے جو کھانا کھایا ہے وہ آپ کی تکلیف کی وجہ بنا ہے تو باقی کھانے کو مزید استعمال سے روکنے کے لیے اسے فوری طور پر ترک کر دیں۔
ڈاکٹر سے مشورہ کریں :
اگر ایسے میں آپ کو شدید علامات کا سامنا کرنا پڑ رہا ہے یا اگر آپ اپنی صحت کے بارے میں فکر مند ہیں تو فوری طور پر طبی امداد حاصل کریں آپ کا معالج آپ کی مخصوص صورتحال کی بنیاد پر رہنمائی فراہم کر سکتا ہے۔
Facebook Comments