fbpx
خبریں

پاکستانی کھانوں کی تعریف کرنے پر مداحوں کے دھونی کو مشورے

سابق انڈین کپتان مہندرا سنگھ دھونی اپنی ایک ویڈیو کی وجہ سے سوشل میڈیا پر چھائے ہوئے ہیں، جس میں وہ اچھے کھانوں کے لیے پاکستان کی تعریف کرتے نظر آرہے ہیں۔

وائرل ویڈیو میں دھونی بظاہر اپنے کسی مداح سے بات کر رہے ہیں، جس میں کھانوں کے سوال پر دھونی نے کہا: ’آپ کو کھانے کے لیے ایک بار پاکستان ضرور جانا چاہیے۔‘ جس کے بعد وہ ہاتھ سے بہترین کا اشارہ بھی کرتے نظر آئے۔

دھونی انڈیا کے ان کھلاڑیوں میں سے ایک ہیں جن کے مداح نہ صرف انڈیا میں موجود ہیں بلکہ پاکستان میں بھی ان کے چاہنے والوں کی کمی نہیں ہے۔ اپنے پسندیدہ کھلاڑی کے منہ سے اپنے ملک کے کھانوں کی تعریف سن کر پاکستانی مداح سوشل میڈیا کے ذریعے خوشی کا اظہار کر رہے ہیں۔

ان مداحوں میں پاکستانی میزبان فخر عالم بھی شامل تھے، جنہوں نے ایکس پر اس ویڈیو کو پوسٹ کرتے ہوئے لکھا: ’بھائی دل جیت لیا آپ نے۔ میرے خیال میں آپ کو ہمارے ساتھ نہ صرف کرکٹ بلکہ کھانے کے لیے پویلین میں ہونا چاہیے۔‘

’دا پویلین‘ ون ڈے ورلڈ کپ 2023 کے دوران کرکٹ کے عظیم پاکستانی کھلاڑیوں کی میزبانی میں ہونے والا ایک ٹی وی شو تھا، جس نے انڈیا میں بھی خوب پزیرائی حاصل کی۔ اس شو کے پینل میں وسیم اکرم، معین خان، مصباح الحق اور شعیب ملک شامل تھے۔

فخر عالم کی ایم ایس دھونی کو دی گئی اس پیشکش پر نکھل نامی صارف نے خوشی کا اظہار کرتے ہوئے وسیم اکرم اور دھونی کو پویلین میں ساتھ دیکھنے کو ’کرکٹ یونیورسٹی‘ قرار دیا۔

دھونی کے اس بیان پر سوشل میڈیا صارف فہد پاکستانی بریانی کو میدان میں لے آئے اور لکھا: ’اگر کراچی کی بریانی کھا لی تو کبھی انڈیا جانے کا دل نہیں کرے گا۔‘

عمران نامی صارف نے ایک اور بحث سے بچنے کے لیے دھونی کو پیغام دیا کہ ’بھائی یہ بھی بتا دیں کہ کون سا شہر؟ کیونکہ یہاں ہم کراچی اور لاہور میں ہی فیصلہ نہیں کر پا رہے ہیں۔‘

ایکس پر سرتاج نامی صارف نے مزید تفصیل دیتے ہوئے لکھا کہ ’اگر آپ سبزی خور نہیں ہیں تو آپ کو اپنی زندگی میں کم از کم ایک بار پاکستان ضرور جانا چاہیے، لیکن اگر آپ سبزی خور ہیں تو انڈیا ان کے لیے بہترین ہے۔‘

جبکہ ارسلان نے تو دھونی کو اپنے ہاتھ سے باربی کیو بنا کے کھلانے کی دعوت بھی دے ڈالی۔

 مہندر سنگھ دھونی نے انڈین ٹیم کے ہمراہ 2006 میں پاکستان کا دورہ کیا تھا، جہاں انہوں نے تین ٹیسٹ میچ اور پانچ ون ڈے میچوں کی سیریز کھیلی تھی۔ اس ٹیم میں سچن تندولکر سمیت راہول ڈریوڈ ، یووراج سنگھ اور گوتم گھمبیر بھی شامل تھے۔

مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔




Source link

Facebook Comments

Related Articles

رائے دیں

Back to top button