پاکستان نے تین ایک روزہ میچوں کی سیریز کے آخری مقابلے میں افغانستان کو جیتنے کے لیے 269 رنز کا ہدف دیا ہے۔
سری لنکا کے دارالحکومت کولمبو میں کھیلے جا رہے میچ میں پاکستان نے پہلے بیٹنگ کرتے ہوئے 50 اوورز میں آٹھ وکٹوں کے نقصان پر 268 رنز بنائے۔
پہلی وکٹ 36 کے مجموعی سکور پر اوپنر فخر زمان کی صورت میں گری، جب وہ افغان بولر گلبدین نائب کی گیند پر ریاض حسین کے ہاتھوں کیچ آؤٹ ہوئے۔ انہوں نے 33 گیندوں پر 27 رنز بنائے۔
دوسرے آؤٹ ہونے والے بلے باز امام الحق تھے، جنہوں نے 30 گیندوں پر 13 رنز بنائے۔ وہ بھی نائب کی گیند پر رحمٰن اللہ گرباز کے ہاتھوں کیچ آؤٹ ہوئے۔
کپتان بابر اعظم اور وکٹ کیپر محمد رضوان نے اس موقعے پر اچھی شراکت داری دکھاتے ہوئے سکور 162 پر پہنچایا تھا کہ بابر 37ویں اوور میں 60 رن بنا کر راشد خان کی گیند پر گرباز کو کیچ دے بیٹھے۔
ان کے بعد سعود شکیل سکور میں کوئی بڑا اضافہ کیے بغیر نو رن بنا کر رن آؤٹ ہو گئے۔
پاکستان کو پانچواں نقصان رضوان (67 رن) کے ایل بی ڈبلیو ہونے کی صورت میں پہنچا۔ انہیں فرید احمد نے 40ویں اوور میں آؤٹ کیا۔
شاداب خان کے محض تین رن بنا کر بولڈ ہونے کے بعد پاکستان مشکل صورت حال کا شکار نظر آیا۔ تاہم آغا سلمان (38* رنز) اور محمد نواز (30 رنز) نے مزید نقصان سے بچاتے ہوئے سکور 250 پر پہنچا دیا۔
اس سیکشن میں متعلقہ حوالہ پوائنٹس شامل ہیں (Related Nodes field)
پاکستان کی آٹھیوں وکٹ فہیم اشرف کی صورت میں گری جو 266 کے سکور پر دو رن بنانے کے بعد فرید احمد کی گیند پر گرباز کے ہاتھوں کیچ آؤٹ ہوئے۔
افغانستان کی جانب سے گلبدین نائب اور فرید احمد نے دو، دو جبکہ فضل الحق فاروقی، مجیب الرحمان اور ارشد خان نے ایک، ایک وکٹ حاصل کی۔
اس سے قبل 24 اگست کو کھیلے گئے سیریز کے دوسرے میچ میں پاکستان کے فاسٹ بولر نسیم شاہ نے تاریخ دہراتے ہوئے افغانستان کے خلاف آخری اوور میں اپنی ٹیم کو ایک وکٹ سے جیت دلوائی تھی۔
سیریز کے پہلے میچ میں پاکستان نے افغانستان کو 142 رنز سے شکست دی تھی۔
اگر پاکستان آج کا میچ بھی جیت جاتا ہے تو انٹرنیشنل کرکٹ کونسل (آئی سی سی) کی او ڈی آئی رینکنگ میں پاکستان نمبر ون پوزیشن پر آجائے گا۔
افغانستان کی یہ ہوم سیریز سکیورٹی خدشات کی وجہ سے سری لنکا میں ہوئی ہے۔
دونوں ٹیموں کے درمیان پہلی دو طرفہ ون ڈے سیریز کے بعد سری لنکا اور پاکستان میں چھ ملکی ایشیا کپ 30 اگست سے شروع ہو گا اور ورلڈ کپ پانچ اکتوبر سے انڈیا میں کھیلا جائے گا۔
You must log in to post a comment.