محکمہ انسدادِ دہشت گردی (سی ٹی ڈی) پنجاب کا کہنا ہے کہ اس نے پولیس کے ہمراہ خفیہ اطلاعات کی بنیاد پر دو مختلف مقامات پر کارروائیاں کرتے ہوئے ’دہشت گردی‘ کے دو بڑے منصوبے ناکام بنا دیے ہیں۔
سی ٹی ڈی کے بیان کے مطابق: ’بہاولپور اور تونسہ شریف میں ہونے والی الگ الگ کارروائیوں میں چھ عسکریت پسند مارے گئے جبکہ متعدد فرار ہو گئے۔‘
بیان میں کہا گیا ہے کہ عسکریت پسند ’ملک دشمن تنظیموں سے تعلق رکھتے تھے اور کسی بڑی تخریبی کارروائی کی منصوبہ بندی کر رہے تھے۔‘
بہاولپور
محکمے کے مطابق بہاولپور میں خفیہ اطلاع پر کارروائی کی گئی، جہاں ’انتہائی مطلوب دہشت گرد‘ کی موجودگی کی اطلاع ملی تھی۔ آپریشن کے دوران عسکریت پسندوں نے فائرنگ کی جس کے جواب میں سی ٹی ڈی اہلکاروں نے بھی جوابی فائرنگ کی۔
کارروائی میں ایک عسکریت پسند مارا گیا جس کا تعلق کالعدم تنظیم سے تھا، جبکہ اس کے تین ساتھی فرار ہونے میں کامیاب ہو گئے۔
موقع سے بڑی تعداد میں گولیاں، ہینڈ گرنیڈ اور دیگر اسلحہ برآمد کیا گیا۔
سی ٹی ڈی کا کہنا ہے کہ بروقت کارروائی سے ایک بڑا سانحہ ٹال دیا گیا۔ واقعے کا مقدمہ درج کر کے مزید تفتیش شروع کر دی گئی ہے۔
تونسہ شریف
ترجمان سی ٹی ڈی کے مطابق تونسہ شریف کے نزدیک سرحدی علاقے میں ایک اہم انٹیلی جنس بیسڈ آپریشن کیا گیا۔
ترجمان سی ٹی ڈی کے مطابق ’یہ کارروائی جمعے اور ہفتے کی درمیانی شب عسکریت پسندوں کی موجودگی کی اطلاع پر عمل میں لائی گئی۔
اس سیکشن میں متعلقہ حوالہ پوائنٹس شامل ہیں (Related Nodes field)
کارروائی کے دوران دہشت گردوں نے سی ٹی ڈی ٹیم پر اندھا دھند فائرنگ کر دی، جس پر شدید جوابی فائرنگ کی گئی۔
جھڑپ کے نتیجے میں پانچ خطرناک عسکریت پسند مارے گئے جبکہ ان کے پانچ ساتھی زخمی حالت میں قریبی جنگل میں فرار ہو گئے۔
ترجمان کے مطابق ’آپریشن کے دوران تین دیسی ساختہ بم، دستی بم، رائفلیں، بارودی مواد اور دیگر خطرناک اسلحہ برآمد ہوا۔‘
سی ٹی ڈی کے مطابق یہ عسکریت پسند کسی بڑی تباہی کی منصوبہ بندی کر رہے تھے جسے بروقت کارروائی سے ناکام بنا دیا گیا۔
فرار ہونے والے عسکریت پسندوں کی تلاش کے لیے علاقے میں سرچ آپریشن جاری ہے اور قریبی مقامات پر ناکہ بندیاں قائم کر دی گئی ہیں تاکہ کوئی دہشتگرد فرار نہ ہو سکے۔
مارے جانے والوں میں سے چار کی لاشیں ہسپتال منتقل کر دی گئی ہیں جبکہ ایک لاش ان کے ساتھی لے کر فرار ہو گئے۔
آشورہ کے موقع پر سکیورٹی ہائی الرٹ
واضح رہے کہ محرم الحرام اور یومِ عاشورہ کے پیشِ نظر پنجاب میں سکیورٹی ہائی الرٹ ہے۔
پولیس اور رینجرز نے مشترکہ سکیورٹی پلان ترتیب دے رکھا ہے، اور حساس مقامات پر سخت نگرانی جاری ہے۔
