دوسرا سیمی فائنل، بڑے میچ میں جنوبی افریقہ پھر چوک گئی، 24 رنز پر 4 کھلاڑی آؤٹ

ورلڈ کپ 2023 کے دوسرے سیمی فائنل میں جنوبی افریقہ نے آسٹریلیا کے خلاف ٹاس جیت کر پہلے بیٹنگ کا فیصلہ کیا اور صرف 24 رنز پر 4 وکٹیں گنوا بیٹھی۔

کولکتہ ایڈن گارڈنز میں کھیلے جا رہے آئی سی سی ون ڈے ورلڈ کپ کے دوسرے سیمی فائنل میں جنوبی افریقہ نے ٹاس جیت کر پہلے بیٹنگ کا فیصلہ کیا جو ڈراؤنا خواب ثانت ہوا اور پروٹیز نے صرف 24 رنز پر 4 وکٹیں گنوا کو ایک بار پھر خود پر چوکر کا لیبل درست ثابت کر دیا۔

جنوبی افریقہ کپتان ٹیمبا باووما پہلے ہی اوور میں چلتے بنے مچل اسٹارک نے انہیں کھاتہ کھولنے کی زحمت بھی نہ دی اور وکٹوں کے انگس کا کیچ بنوا دیا۔ کوئنٹن ڈی کاک بھی تین رنز کے مہمان ثابت ہوئے جس کے لیے انہوں نے 14 گیندیں ضائع کیں۔ انہیں ہیزل ووڈ نے آؤٹ کیا۔

صرف 8 رنز پر دو وکٹیں گرنے کے بعد جنوبی افریقی بیٹنگ کچھوے کی طرح سست ہوگئی اور 10 اوورز کے اختتام پر صرف 18 رنز ہی بنائے تھے کہ 11 ویں اوور میں مچل اسٹارک نے ایڈن مارکرم کو آؤٹ کر دیا۔ انہوں نے 2 چوکوں کی مدد سے 10 رنز بنائے۔

اگلے ہی اوور میں ہیزل ووڈ نے ڈوسن کو 6 رنز پر پویلین واپس بھیج دیا جس کے لیے پروٹیز بیٹر نے 31 گیندیں کھیلیں۔

4 وکٹیں گرنے کے بعد جنوبی افریقہ شدید مشکلات کا شکار ہے۔ پروٹیز نے 13 اوورز کے اختتام پر جنوبی افریقہ نے 32 رنز بنا لیے ہیں۔ کریز پر کلاسین اور ڈیوڈ ملر موجود ہیں۔

آج کے میچ کے لیے جنوبی افریقہ کی ٹیم میں ایک جب کہ آسٹریلوی ٹیم میں دو تبدیلیاں کی گئی ہیں۔

پروٹیز اسکواڈ میں لنگی انگیڈی  کی جگہ تبریز شمسی کو شامل کیا گیا ہے جب کہ کینگروز کی فائنل الیون میں گلین میکسویل اورمچل اسٹارک کی واپسی ہوئی ہے جس کے لیے مارکس اسٹوئنس اور شان ایبٹ کو جگہ خالی کرنی پڑی ہے۔

ٹاس کے بعد جنوبی افریقی کپتان ٹمبا باووما نے کہا کہ کوشش کریں گے اپنے پلان کےمطابق کھیلیں جب کہ کینگرو کپتان پیٹ کمنز کا کہنا تھا کہ اگر وہ ٹاس جیت جاتے تو ان کی بھی پہلی ترجیح بیٹنگ کرنا ہوتی۔

ٓسٹریلیا کا ورلڈ کپ کے سیمی فائنل میچز میں ریکارڈ شاندار ہے جس نے اب تک 8 ناک آؤٹ مرحلے کے میچ کھیلے ہیں اور 7 بار فاتح بن کر میدان سے باہر آئی۔

ہیڈ ٹو ہیڈ مقابلوں میں جنوبی افریقہ کو آسٹریلیا پر سبقت حاصل ہے۔ دونوں ٹیموں نے اب تک 109 میچز کھیل رکھے ہیں جن میں 55 میں پروٹیز فتحیاب رہے جب کہ 50 میں کینگروز نے بازی ماری۔

عالمی کپ دونوں ٹیمیں سات بار مدمقابل آئیں۔ آسٹریلیا نے 4 اور جنوبی افریقہ نے 3 میچوں میں کامیابی سمیٹی۔

آج دیکھنا ہوگا کہ پروٹیز چوکرز کا داغ مٹا پاتے ہیں یا پھر کینگروز انہیں زیر کر کے فائنل میں جگہ بناتے ہیں۔ فاتح ٹیم اتوار 19 نومبر کو ورلڈ کپ فائنل میں بھارت سے ٹکرائے گی۔

دوسری جانب میچ کےدوران بارش کی بھی پیشگوئی ہے تاہم ناک آؤٹ میچز کیلیے اضافی دن بھی رکھا گیا ہے۔ دو دن میں بھی میچ پورا نہ ہو سکا تو جنوبی افریقہ بہتر رن ریٹ کی بنیاد پر فائنل میں چلا جائے گا۔

ورلڈ کپ کے تمام میچز اے اسپورٹس پر براہ راست دکھائے جا رہے ہیں۔

آج کے میچ کے لیے دونوں ٹیمیں ان کھلاڑیوں پر مشتمل ہیں۔

جنوبی افریقہ:

ٹیمبا باوومے (کپتان)، کوئنٹن ڈی کاک، وین ڈر ڈوسن، ایڈن مارکرم، ہینرک کلاسین، ڈیوڈ ملر، مارکو جینسن، کیشو مہاراج، گیرالڈ کوٹزی، کگاسو ربادا اور تبریز شمسی۔

آسٹریلیا:

پیٹ کمنز (کپتان)، ٹریوس ہیڈ، ڈیوڈ وارنر، مچل مارش، اسٹیون اسمتھ، مارنس لبوشھن، گلین میکسویل، جوش انگلس، مچل اسٹارک، ایڈم زمپا اور جوش ہیزل ووڈ۔

Comments