کوئٹہ : نواز شریف کی وطن واپسی کے بعد مسلم لیگ ن نے انتخابات کی تیاریاں شروع کردیں، ذرائع کے مطابق بلوچستان کے سابق وزراء اور ارکان اسمبلی نے ن لیگ میں شمولیت کا فیصلہ کرلیا۔
تفصیلات کے مطابق بلوچستان کی اہم سیاسی شخصیات نے ن لیگ میں شمولیت کا عندیہ دیا ہے، سابق اسپیکر قومی اسمبلی اور سینئر لیگی رہنما سردار ایاز صادق کوئٹہ پہنچے جہاں ان سے سابق وزرا، ارکان قومی و صوبائی اسمبلی اور بلوچستان کی ممتاز سیاسی شخصیات نے ملاقاتیں کرکے ن لیگ میں شمولیت کا عندیہ دیا۔
ایاز صادق سے شیخ جعفرمندوخیل کی قیادت میں سابق وزرا، ارکان نے ملاقات کی، دیگر ارکان میں سابق وزرا سردار عبدالرحمن کھیتران، میر عبدالغفور لہڑی، سابق رکن قومی اسمبلی میر دوستان ڈومکی اور بلوچستان کی سابق ایم پی اے ربابہ خان بلیدی کے علاوہ دیگر شخصیات شامل تھیں۔
ملاقات کرنے والی شخصیات نے نوازشریف کی قیادت پر بھرپور اعتماد کا اظہار کرتے ہوئے کہا کہ نوازشریف ہی ملک کو مسائل اور بحرانوں سے نجات دلاسکتے ہیں۔
Facebook Comments