ادب کا آسمان اُس لمحے روشن ہوا جب بھارتی مسلمان مصنفہ بانو مشتاق کے افسانوی مجموعے ہارٹ لیمپ نے بین الاقوامی بکر پرائز اپنے نام کیا۔ یہ صرف ایک اعزاز نہیں، بلکہ اُن تمام دبی، سسکتی اور چپ چاپ ظلم سہتی عورتوں کی آواز کی عالمی شناخت ہے، جنہیں بانو مشتاق نے اپنی کہانیوں کے قالب میں ڈھالا۔
بانو مشتاق کا یہ مجموعہ، جو اصل میں کنڑ زبان میں تھا، دیپا بھاستھی نے نہایت حساس انداز میں انگریزی میں منتقل کیا۔ دونوں تخلیق کاروں کو مل کر 50,000 پاؤنڈز کا انعام دیا گیا، جو ان کے درمیان برابر تقسیم ہوگا۔
ججوں کے سربراہ میکس پورٹر نے ہارٹ لیمپ کو "پدرشاہی کے خلاف خاموش مگر شدید مزاحمت کی داستان” قرار دیا، اور مترجمہ کی کاوش کو ایک "ادبی کارنامہ” کہا۔ کیٹ میک لافلن نے، جو دی ٹائمز لٹریری سپلیمنٹ میں لکھتی ہیں، ان کہانیوں کو "ایسی تحریریں جو دیکھتی ہیں، محسوس کرتی ہیں، اور کسی بھی روایتی خانے میں فٹ نہیں ہوتیں” قرار دیا۔
ہارٹ لیمپ کی نمایاں کہانیوں میں ایک عورت کی درد بھری فریاد ہے جو اپنے زانی شوہر سے رہائی کے لیے خاندان کے سامنے جھولی پھیلاتی ہے، مگر جب اُسے خاموش کروا دیا جاتا ہے تو وہ زندگی چھوڑنے پر غور کرتی ہے۔ ایک اور کہانی میں ایک ماں مذہبی پیشوا سے اپنے بیمار بچے کے علاج کے لیے شوہر کی مدد کا تقاضا کرتی ہے، لیکن اسے روحانیت کی دیوار سے ٹکرا کر واپس آنا پڑتا ہے۔
بانو مشتاق، جو 77 برس کی عمر میں بھی قلم کو مشعل بنائے ہوئے ہیں، نہ صرف وکیل اور صحافی رہی ہیں بلکہ ایک سرگرم سماجی کارکن بھی ہیں۔ ان کا کہنا ہے:
"میری تحریریں اخبار کی سرخیاں نہیں، بلکہ ان عورتوں کی چیخیں ہیں جن سے میں زندگی کے سفر میں ملی ہوں۔ دل میرا میدانِ مطالعہ ہے؛ جو صدمہ دل پر لگتا ہے، وہی قلم پر اترتا ہے۔”
بکر پرائز کی ویب سائٹ پر بات کرتے ہوئے انہوں نے کہا:
"میری کہانیاں عورتوں کے گرد گھومتی ہیں جن پر مذہب، معاشرہ اور سیاست اطاعت کا لبادہ اوڑھنے پر مجبور کرتی ہے، اور اسی لبادے میں وہ ان کی شناخت کو دفن کر دیتے ہیں۔”
ہارٹ لیمپ نہ صرف ایک ادبی کامیابی ہے بلکہ اُن تمام عورتوں کی نمائندگی بھی ہے، جن کی کہانیوں کو اکثر سنا ہی نہیں جاتا۔ بانو مشتاق نے وہ درد چُنا، جو اکثر لوگ چھوڑ دیتے ہیں، اور اسے کہانی بنا دیا۔
