لاہور کے تعلیمی ادارے فارمین کرسچن کالج یونیورسٹی (ایف سی سی یو) میں دسمبر کا مہینہ آتے ہی کرسمس کی تیاریاں شروع ہو جاتی ہیں۔ یہ موقع نہ صرف مسیحی طلبہ بلکہ تمام مذاہب کے افراد کے لیے ایک دوسرے کے ساتھ جڑنے اور خوشیاں بانٹنے کا ذریعہ بنتا ہے۔
ایف سی سی یو کی کرسمس تقریبات کی ابتدا طلبہ کے خوبصورت کیرول گانوں سے ہوتی ہے۔ کیمپس میں جگمگاتی روشنیوں کے درمیان جب یہ گانے گائے جاتے ہیں تو ماحول خوشیوں سے بھر جاتا ہے۔
ایک مسیحی طالب علم کا کہنا تھا کہ ’ایف سی کالج نے تنوع کو فروغ دیا ہے اور یہاں ہر مذہب اور کلچر کے لوگوں کے درمیان بہت احترام ہے۔ جب کرسمس آتا ہے تو مختلف مذاہب کے لوگ اسے عزت اور جوش کے ساتھ مناتے ہیں۔ یہ ایک مثبت اور منفرد چیز ہے جو ایف سی سی یو کو خاص بناتی ہے۔‘
ایف سی سی یو کے ایک رہائشی کا کہنا تھا کہ ’مجھے یہاں پر رہتے ہوئے چھ سال ہو گئے ہیں اور میں نے دیکھا کہ ایف سی سی یو کے اندر تمام تہوار بڑھ چڑھ کر منائے جاتے ہیں۔ یہ تہوار چاہے کسی کمیونٹی کے ساتھ منسلک ہو۔ عید کا موقع ہو یا کرسمس، ساری کمیونٹیز مل جل کر مناتی ہیں۔ انسانیت ہمیں یہ درس دیتی ہے کہ ایک دوسرے کے جذبات کی قدر کی جائے اور اسی وجہ سے ایف سی کالج کے اندر لوگ، جس بھی کمیونٹی سے تعلق رکھتے ہوں، ایک دوسرے کی خوشی میں لازمی شامل ہوتے ہیں۔‘
کرسمس ڈنر ایف سی سی یو کی تقریبات کا ایک اہم حصہ ہے، جہاں طلبہ، اساتذہ اور عملہ ایک ساتھ کھانے سے لطف اندوز ہوتے ہیں۔ اس موقع پر اتحاد اور شکر گزاری کی خوبصورت مثال دیکھنے کو ملتی ہے۔
ایف سی سی یو کے پاسٹر نے بتایا کہ ’کرسمس خداوند یسوع مسیح کی پیدائش کی خوشی کا دن ہے اور ایف سی کالج میں اسے مذہبی ہم آہنگی کے ساتھ منایا جاتا ہے۔ کیرلز، کرسمس پلے، اور مختلف پروگرامز کے ذریعے طلبہ اور فیکلٹی مل کر خوشی مناتے ہیں۔ ہر مذہب کے لوگ اس جشن میں شامل ہو کر محبت اور امن کا پیغام عام کرتے ہیں۔‘
اس سیکشن میں متعلقہ حوالہ پوائنٹس شامل ہیں (Related Nodes field)
ایف سی سی یو کے چیف آف سٹاف نے اس موقعے پر کہا کہ ’ایف سی کالج میں محبت، صلح اور ہم آہنگی کا پیغام صرف کرسمس تک محدود نہیں بلکہ یہ یہاں کے ہر دن کی پہچان ہے۔ کرسمس کے موقع پر منعقد ہونے والے پروگرامز، جیسے کیرل سنگنگ، ٹیبلوز، اور ڈرامے، اس موٹو ‘By Love Serve One Another’ کو زندہ رکھتے ہیں، اور ہر فرد اس خوشی کو اپنی خوشی سمجھ کر مناتا ہے۔ یہ واقعی ایک خوبصورت مثال ہے کہ محبت اور خدمت کے ذریعے سب کیسے اکٹھے ہوتے ہیں۔
ایف سی سی یو میں کرسمس نہ صرف ایک مذہبی تہوار ہے بلکہ اتحاد، محبت اور ہم آہنگی کی مثال ہے۔ یہ ہمیں یہ یاد دلاتا ہے کہ دنیا میں امن اور بھائی چارے کا پیغام ہر مذہب کا مقصد ہے۔